Pangaliya sa piniliay

Tungod sa nagkainit nga panagsungi sa mga politiko, nga nisangpot sa pagsilaob sa tinulisokay sa ilang mga dumadapig, online ug offline, niawhag ang mga madre sa katawhan sa pagpiko sa ilang mga tuhod ug sa paghangad sa langit aron nga makaangkon og balaanong giya pag-atubang sa makasaysayanong lokal ug nasudnong piniliay upat ka adlaw gikan karon.

Nangahas ko og awhag sa mga tigpaminaw sa DYAB Abante Pa, Bisaya! sa pagtampo og mga pag-ampo alang sa hapsay ug makahuloganon nga piniliay karong Lunes, Mayo 9. Nagbaha ang ilang mga pangiliyupo nga gipaagi sa text messages ug sa social media. Gisukip sab nako ang mga pangaliya sa katawhan sa nagkalainlaing kanasuran sa nangagi nilang mga piniliay. Niang hinugpong nga mga pangilaba.

* * *

Mangaliya mi alang sa mga kandidato; nilang among botaran ug nilang di namo botaran. Giila namo ang ilang mga pagsuway; gisaway sila; giablihan ang ilang pribadong kinabuhi; pila nila nagpasiugda ug nahiagom og linabayay sa lapok. Mangaliya mi alang sa mga kandidato nga modaog ug mapilde: hinaot nga magpabilin silang matinud-anon sa kinabuhi sa pag-alagad.

Mangaliya mi alang sa mga nagduma sa piniliay: nilang magtukaw sa adlaw sa piniliay; nilang gipaabot nga moatiman sa tanang moapil sa piniliay; nilang mogahin og dugang panahon alang sa mga nagkinahanglan og dugang tabang. Hinaot nga malumo ang ilang kasingkasing, ug hinaot nga ilang mabatyagan nga ang pag-alagad sa piniliay makatagbaw.

Mangaliya mi alang sa mga botante: nila nga maghuwat sa taas nga mga linya; nila nga di makabotar; nila nga nakasinati og panagsungi sa mga pamilya ug mga higala tungod sa managlahi nga politikanhong panglantaw.

* **

Langitnong Amahan, nangilaba kami kanimo pagtabang namo sa makinaadmanong pagpili sa among bag-ong mga lider. Pahibaw-a ang among mga tanlag ug lamdagi ang among paghukom, aron nga makapili mi nila nga manggiluy-on nga mopatigbabaw sa hustisya ug maningkamot pagpanalipod sa labing kabos namo. Tabangi mi nga makatugkad kinsa ang mga kandidato nga mopatigbabaw sa balaod.

Hinaot ang among mga lider motahud sa kamahinungdanon sa pamilya ug sa kabililhon sa matag kinabuhi. Hinaot ang among mga lider kanunay’ng mobalanse sa ekonomikanhong kalamboan uban sa pag-amuma sa mga hamtong, mga timawa, mga masakiton ug mga tinalikdan. Makapili unta mi og mga lider nga maningkamot alang sa tinuod nga kalinaw ug makiangayong pag-apud-apod sa nasudnong katigayonan. Hinaot makapili mi og mga lider nga kanunay’ng mopatigbabaw sa kaayuhan sa labing daghan ug manalipod sa among balaanong mga katungod.

Labaw’ng Makagagahom, hupaya ang pagkabuakbuak nga nakasamad sa among panaghiusa ug tabangi kami nga molantaw lapas sa politikanhong mga panagsungi nga nakapugong namo nga mamahimong nagkahiusang puwersa alang sa katarung. Amen.

[email protected].