Naalarma ang kadagkoan sa Bureau of Fire Protection (BFP) Region 7 sa nadawat niini nga report nga adunay mga nagpakaaron-ingnon nga bombero nga nihimo og fire safety inspection sa mga balay patigayon.
Usa ra gyud ang tumong niining mga tawhana – ang pagpanguwarta.
Aron makasiguro ang publiko nga tinuod gyud nga fire inspectors ang mianha sa ilang balay patigayon, pangitaan ninyo og ID sa Bureau of Fire Protection.
Kinahanglan usab nga magdala sila og inspection order nga pinirmahan sa hepe sa fire station diin sila madestino ug mag-uniporme gyud sila. Mas maayo pud nga mangutana kamo og asa sila na-assign.
Kining maong pahimangno makatabang kaninyo nga dili kamo mabiktima sa mga fake inspectors. Angayan lang natong mahibaw-an nga ang pag-conduct sa fire safety inspection sa mga sakop sa BFP walay bayad kay apil na kini sa bayad sa inyong business permit.
Kun ang mo-inspection sa inyong establishment mangayo gani og kuwarta, report dayon sa opisina sa BFP regional direktor (254-8386) aron maaksyonan sa among opisina.
Daghan na kaayo ang ingon niini nga pagpangilad sa mga nagpakaaron-ingnong bombero. Lisud kaayo nga maduhigan ang pangalan sa BFP niining mga tawo nga mapahimuslanon.
Kuyaw pa gyud kun mosulod kini sila sa mga panimalay aron kunohay mag-inspection apan mangawat o ba kaha mohimo og laing krimen unya migamit sa uniporme sa bombero.
Sa pagka karon, gisugdan na ang pag-ila niining mga tawhana kay nakuhaan man sila og footage sa CCTV ug mahimong mapasakaan sila og kaso kun madakpan.
Kadtong mga nabiktima ayaw kamo pagduha-duha pagpahibalo sa inyong kasinatian ngadto sa mga fire stations duol sa inyong lugar kay sigurado ang BFP-7 nga ubay-ubay na gyud ang nabiktima sa maong sindikato.