Dear Atty. Divine,
May ipangutana ko labot sa sayop nga entry sa akong date of birth sa among marriage certificate. Ang nabutang sa among marriage certificate kay 1985 ko natawo, apan ang tinuod gyud nako nga date of birth kay 1983. Niadtong 2008 mi gikasal. Ang akong pangutana kun valid ba ang among kasal bisan kun dunay sayop nga entry sa Marriage Certificate? Kun valid, unsa may akong buhaton aron makurihean kining sayop nga entry. Daghang salamat. — Honey
Dear Honey,
Ang sayop nga entry sa marriage certificate dili maka-invalid sa inyong kasal basta natuman lang ang tanang rekisitos niini nga gilatid sa balaod. Kun niadtong 2008 mo gikasal ug ikaw natawo niadtong 1983, buot ipasabot nga at that time nga gikasal ka anaa ka na sa hustong edad kay 25 anyos ka na. Mahimo lang invalid ang kasal kun pananglit gikasal kamo at that time nga diin ang usa kaninyo, menor de edad pa. Base sa atong Family Code, ang rekisitos sa pagpakasal nga makaapekto sa validity niini kun dili nimo matuman mao ang edad sa nagpakasal nga kinahanglan 18 anyos pataas, kinahanglan nga adunay valid marriage license, dunay marriage ceremony ug kinahanglan nga adunay authority to solemnize marriage ang nagkasal ninyo ug uban pa nga rekisitos nga nalatid sa balaod. Ang maayo nimo nga buhaton karon mao ang pagpa-correction sa entry sa imong marriage certificate sa Local Civil Registrar diin kamo narehistro. Kinahanglan nga imong ipakita ang imong Birth Certificate gikan sa NSO ug aduna pay laing mga dokumento nga pangayuon gikan kanimo ang Local Civil Registrar aron makurihean ang imong marriage certificate ug mas maayo nga adto ka nila mangayo og listahan sa mga requirements. Thanks and God Bless. – Atty Divine
Alang sa inyong pangutana, ipadala lang sa Legal Corner, Banat News, V. Gullas St., Cebu City or email sa flores_divina@yahoo.com ug akong tubagon ang inyong pangutana pinaagi sa akong column.