EDITORYAL - Wa nay gana sa SK

Menus kaayo ang mga nagparehistro nga kabataan alang sa umaabot nga Pebrero 21, 2015 Elections. Timailhan ba kini nga gipul-an na ang kabataan niini ug ang nagpabilin kadto na lang nangambisyon og political career?

Base sa mga reports nga nanggawas dinhi sa Sugbo, menus g’yud ang nagparehistro sukad nga gihimo ang special registrations alang sa kabataan nga matapos na karong Septiyembre 29.

Ang special registration gituyo aron ma-accommodate ang kabataan apan daw wala kini panumbalinga tungod kay gilangaw ang mga buhatan sa Comelec pagpinaabot sa mga first time voters sa SK.

Ang Comelec buot nga mopahigayon sa maong eleksyon sa sunod tuig samtang gipaabot pa ang pagpasar sa SK reform law nga nagtinguhang patas-an ang age qualification sa mga botante sa SK ug sa mga mokandidato ug ang anti-political dynasty.

Apan duna karoy usa ka balaudnon nga giduso sa Kongreso ni Davao del Norte Rep. Anthony Del Rosario nga House Bill 5006 nga nagtinguhang isibog na usab ang eleksyon sa SK karong Oktubre 2016 dungan sa Barangay Elections.

Kini nga lakang maghatag na usab og labad sa ulo sa Comelec tungod kay nianang tuiga usab himuon ang National and Local Elections sa buwan sa Mayo.

Niadto pa untang miaging tuig 2013 ang SK Elections apan gisibog sa Pebrero 2015 tungod sa kakulang sa pangandam, pundo ug ang mga isyu kabahin sa reporma niini. Gipasanginlan ang sistema sa SK nga huyang gumikan kay nahimo na kining “breeding ground” sa kurapsyon kay naimpluwensyahan sa mga politiko ang ilang pagdumala hinungdan nga nakabuntog sa kapuslanan niini.

Samtang nagpaabot ang pagtuki sa reporma niini diha sa Kongreso, kung interesado pa gayud ang kabataan, nagpunsisok na unta sila karon sa mga Comelec offices ilabi na nga nagkaduol na ang deadline.