Pasirad-an ni Mayor Mike Rama ang mga sanga sa LBC Express nga anaa mahimutang gawas sa mga mall nga walay guwardiya human nga daghan kanila ang nabiktima sa sagunson nga pagpanulis.
Tungod sa kamandoan sa mayor, ang opisyal sa LBC Express nakigkita kaniya ug mihangyo sa dili pagpatuman sa iyang kamandoan apan gibalibaran sa mayor ang hangyo.
Aduna bay gahom ang mayor sa pagpasira sa LBC Express? Makataronganon ba sa LBC nga kini pasirad-an tungod lang kay kanunay kining giigo sa mga tulisan?
Ang mga abogado sa dakbayan sa Sugbo miingon nga adunay gahom ang mayor sa pagpasira sa LBC Express base sa police power sa mayor. Ang “police power” gahom kini sa gobiyerno pag-regulate kun paglimita sa kagawasan ug propiedad alang sa kaayohan sa kadaghanan.
Ang LBC Express gimando nga pasirad-an sa mayor tungod sa kapakyas niini sa pagbutang og mga security guard sa ilang mga patigayon nga miresulta sa pagka paborito niini sa mga tulisan.
Pero nganong ang nahisgotang patigayon ra man ang pasirad-an sa mayor nga unta aduna may daghang susama nga patigayon diha nga wala poy mga security guard? Tungod ba kay wala sila tulisa?
Ang LBC Express gipasirad-an sa mayor tungod kay kanunay kini nga giigo sa mga tulisan. Dili ba doble nga pagpasakit ang nahimong hukom sa mayor? Sayonan ka, gitulis ka na, pasirad-an pa g’yud ang balay-patigayon?
Ang nakaapan gud sa ubang tagdumala sa LBC Express kay gahi og ulo, dili makasabot. Bisan kadaghan na gisultihan sa mga otoridad nga pabutangan og guwardiya ang ilang mga patigayon wa g’yud gihapon. Mao nga maayo ra pud nga patagmon.