Dear Atty. Divine,
Usa ako ka OFW nga adunay duha ka anak. Ang panganay ko nga anak nga menor pa milayas sa among balay kay sigehan og kasaba sa iyang inahan ug usahay gani iyang sirad-an sa gawas sa balay ug may mga higayon nga iyang kumoton ang baba. Naluoy ko sa akong anak kay naa ni sakit sa kasingkasing ug gipasagdan lang sa iyang inahan. Ako na nga gibadlong ang inahan apan matud niya wa kuno siya’y future aning among panganay nga anak. Hangtod karon wala pa mopauli ang akong anak ug wala sab siya pangitaa sa inahan. Unsa may maayo nako nga buhaton aron madesiplina ning akong asawa? Mahimo ba nako ni siya nga ireport sa DSWD? Palihug tambagi ko kon unsay angay nakong buhatan aron mausab ang batasan sa akong asawa. — Jun
Hi Jun,
Mahimo ka nga modangop sa DSWD ug ireport kanang gibuhat sa imong asawa pagmaltrato sa imong anak aron mahimoan kini og aksyon. Mahimo sab ka nga mopasaka og kasong child abuse batok sa imong asawa aron paghatag kaniya og leksyon. Kon duna kay laing pamilya o mga ginikanan mas maayo nga adto na lang una nimo papuy-on ang imong anak aron siya maatiman kay naa ra ba diay ni siya’y sakit sa kasing-kasing. Gawas pa, kon pasagdan nimo ang imong anak nga imaltrato sa iyang inahan hayan dako kini og psychological effect sa bata. Kanang batasan sa tawo lisud na g’yud na usbon ug ang Ginoo ra g’yud ang makausab sa tawo kon imo kining pangayuon kaniya. - Atty. Divine
Alang sa imong pangutana, ipadala lang sa Legal Corner sa Banat News sa V. Gullas Street, Cebu City or email sa flores_divina@yahoo.com. ug akong tubagon ang inyong pangutana pinaagi sa akong column matag Miyerkules ug Domingo.