Dakong pagsuway

Wala pa gihapon ko huwasi sa kalipong human niadtong kusog nga linog nga mitay-og sa Bohol ug Sugbo niadtong Martes.  Usahay magbawod-bawod hangtod karon akong paminaw tungod lagi sa grabe’ng uyog sa yuta.

Nahipugwat ko sa akong pagkatulog sa dihang miuyog ang kama nga akong gihigdaan sa balay. Paminaw ko gibira-bira akong tiil. Apan sa akong pagmata, grabe’ng uyog sa balay ug puwerte kurata sa akong asawa ug duha ka babayeng anak.

Samtang kamulong linog, dali silang mikamas padulong sa kusina ug misuok ilalum sa banggera. Ug tungod kay dili mi tanan paigo ilalum sa banggera, mideretso na lamang ko sa kaselyas.

Wala na hinuon ko kabalik og tulog. Nahadlok kong mouyog na usab. Nangandam na lamang kami sa sunod-sunod nga mga aftershocks. Tinuod man, grabe gyud tuod ang sunod-sunod nga mga tay-og.

Paghugpa sa tanan, nagbuy-od ang mga patay. Dinhi sa dakbayan sa Sugbo, ubay-ubay gayud ang mga biktima. Upat diha-diha ang patay didto lamang sa Pasil Fish Port sa paghugno sa mga gutter niini.

Didto sa Mandaue City market, patay usab ang usa ka vendor sa dihang natabunan kini sa usa ka dingding. Usa kini sa gibisita ni President Aquino sa iyang pagduaw sa Sugbo sa niaging adlaw.

Didto sa dakbayan sa Talisay, walay swerte ang usa ka babaye human ang sakyanan niini nadat-ogan sa porsiyon sa usa ka balay nga natumpag. Hinuon nakalingkawas gikan sa kamatayon ang mga kauban niini sulod sa sakyanan.

Gani, didto sa dakbayan sa Toledo ug lungsod sa Pinamungajan, nangalibwag ang mga buot mokuha sa ilang benepisyo sa DSWD pag-igo sa linog.  Adunay stampede hinungdan nga daghan ang naangol.

Apan ang labing ngilngig nga talan-awan paghuman sa linog mao ang kadaot nga nasinati didto sa silingang probinsiya sa Bohol. Subra na sa usa ka gatos ang namatay didto. Ug grabe ang kadako sa kadaut sa mga edepisyo ug ubang kabtangan.

Akong simpatiya ngadto sa mga napagan sa maong linog. Nagkinahanglan gayud sila og dakong tabang dili lamang gikan sa kagamhanan kondili gikan usab kanatong tanan.

Ato usab nga gipanghinaut ang dali nga recovery sa mga biktima sa maong trahedya. Bisan pa man sa dakong pagsuway nga ilang nasinati karong panahona, dako atong pagtuo nga ila kining masagubangan. Mao kana ang kinabuhing Pilipino. Bisan pa man sa dakong katalagman dili gayud kini matarog ug padayong lig-on ang espiritu niini.