Paghugas sa mga tiil sa Apostoles

Huwebes Santo. Mao kining adlawa nga gihugasan ni Hesus ang mga tiil sa Iyang 12 ka tinun-an. Nakalitan si Simon Pedro, ang usa kanila. Wala siya magtuo nga ang ilang Maestro, ilang lider mangunay paglimpiyo sa ilang mga tiil. Naikog siya. Busa, mibalibad.Giingnan siya ni Hesus. “Di pa ninyo hisabtan ang akong gibuhat karon. Apan human unya niini makasabot ra kamo.”

Wala gihapon makombinse si Simon Pedro. Busa gisultian siya sa Maestro: “Ang dili magpahugas, dili mahimong kabahin nako.”

Pulong nga nakatin-aw sa hunahuna ni Simon Pedro. Pulong nga nakaaghat pagtahan sa iyang tibuok kaugalingon pinaagi sa paghangyo: “Kun mao, Maestro, hugasi dili lang ang mga tiil ko. Lakip na akong mga kamot ug ulo, hugasi usab!” Dayag kaayo nga nahadlok si Simon Pedro nga mahilayo sa mga kamot sa Ginoo. Busa, gipatara dili lang ang iyang lawas; kun dili, hasta iyang kalag, gipaapil niya’g pahugas. Nahinumdom nuon ko sa nahitabo nako.

Abril 6, 2010, na-ospital ko. Grabe akong kahimtang kay 40% na lang mohatag og hemoglobin ug red blood cells akong bone marrow. Base sa resulta sa eksaminasyon, may sakit diay kong Aplastic anemia ug kinahanglan nga ipa-bone marrow transplant ko. Ubay-ubay nang bag sa dugo ang giabuno sa akong lawas. Apan nagpabiling dili stable akong kahimtang. Mao kadto nga sa hilom, samtang naghigda ko nga gidekstrosan, may gipangayo ko sa Ginoo: “Lord, heal me physically, mentally and spiritually. I surrender   my whole life to you now. Wash all my sins with Your power of love...and Thy will be done, Lord.”

Sama ni Simon Pedro, nagpahugas sab ko sa akong mga tiil ni Hesukristo. Ug human niya ako malimpiyohi sa tanang salaod nga nahimo, wala ko makasabot sa kagaan sa lawas nga akong gibati. Basta, segun sa nahinumdoman ko, mitulo akong mga luha samtang mikompisal sa pari sulod sa tambalanan. Nahinumdom sab ko sa nasulat sa gibasa kong bibliya. Usa ka higayon, misugo ang Ginoo sa Iyang mga apostoles: “Lakaw, isangyaw ang mga pulong sa kaluwasan. Kun ang dapit nga inyong adtoan, dili maminaw ug ang mga tawo dili motuo, biyai kanang dapita itaktak ang mga abog nga mipilit sa inyong mga lapalapa.”

Nga sa ato pa, kinsa kadtong mga makasasala nga dili magpahugas sa ilang mga sala tungod kay kulang sa pagtuo sa gahom sa Diyos, aw...dili gyud maluwas. Mahimula’g gyud kaniya.

Ang paghugas sa Ginoo sa lapalapa sa Iyang mga tinun-an, nagtudlo nato nga mag-iyahay tag tinabangay sa matag usa aron maato sa hingpit ang kaluwasan. Mangayo ta’g pasaylo sa nakasala nato ug andam sab ta mopasaylo sa nakasala nato. Iya tang gitudloan nga bisan kita ang lider sa pundok, kinahanglan nga kita maoy mosilbe sa atong mga tawo, imbes kita maoy magpasilbe. Kita ang unang mohugas sa ilang tiil. Buwahan, makat-on sab sila sa pagpanghugas sa uban.