Paminyuan ang Uyuan!

Dear Tito Miguel,

Ako si Elisse, taga Norte. Hingkod na ang panuigon, dalaga. Pobre mi, maong akong iyaan nga adunahan og bana maoy nagsuporta nako. Pinangga kaayo ko nilang magtiayon, ilabi na nga wala silay anak.

Karon, akong tiya gitagalan na akong kinabuhi gumikan sa grabeng balatian. Tito, nanugon naman akong iyaan nga inig kamatay niya, minyuan nako iyang bana. Nisuporta sab akong mama nga single parent. Kalain uy! Unsaon nako pagbalibad akong iyaan basin ako na hinuon ang makaingon nga mamatay siya diretso?

Elisse

* * *

Elisse,

Lagmit gusto lamang sa imo’ng iyaan masiguro nga inig kawala niya, duna’y makauban ug moatiman sa iya’ng bana. Ipasalig kaniya nga karon ug ugma, wala ka’y pasagdan nila’ng duha. Pasabta siya nga tungod sa kaayo nila’ng duha, imo na sila’ng giisip nga mga ginikanan. Busa supak sa imo’ng kunsensiya ang iya’ng gitugon.

Posible usab nahadlok imo’ng iyaan nga duna’y laing tawo makatagamtam sa ila’ng kaadunahan. Busa dili siya gusto maminyo iya’ng bana sa maski ni kinsa lamang. Sa iya’ng kadatu, duna gyud ni sila’y abugado. Isugyot nga mokonsulta didto sa iya’ng bahin sa ila’ng kabtangan aron iya’ng gusto maoy matuman. Apan isugyot lamang kini kun siya maoy una mohisgot kay basin magduda sa imo’ng intensyon. Mahimo sad motambag ang abugado kun gitugot ba sa balaod iya’ng gusto nga ikaw ug imo’ng uyoan mahimong kasado.

Lagmit sab iya’ng kabuot apektado na sa iya’ng balatian sa lawas busa nakapanugo’g dili mao, nga dili unta niya mahunahunaan kun siya baskog pa. Busa kun ikaw sunahon, ilingiw iya’ng atensyon. Paghisgot ug pagpasalamat sa iya’ng kaayo nimo. Dasiga siya nga duna pa’y paglaom nga maayo iya’ng balatian ug awhaga nga hingpit maglingaw mata’g adlaw. 

Ayaw ulo-ulohi imo’ng iyaan aron lamang matagbaw iya’ng hunahuna. Kay mas ngil-ad kun mopasalig ka’g pakasal sa imo’ng uyoan unya dili nimo tumanon. Ang maong bakak iya’ng baonon ngadto sa iya’ng lungon. Wa ka maghisgot kun nakahibawo ba imo’ng uyoan sa iya’ng gitugon. Angay sad ni tubagon. Kay lagmit siya mismo makugang ug sa pagpasabot sa pagbalibad siya makatabang.

Tito Miguel