Panumpa sa pangpang

Nalantawan na niya ang sakayan ni Makoy. Usa ka mananagat si Makoy. Ug si Mercedita usa ka graduwado sa kursong Komersiyo. Mao bitaw nga supak kaayo ang iyang mga ginikanan.

“Nagpakauwaw ka lang gyud, Mercy!” Banghag sa iyang amahan nga si Tokles.    “Na, na igo na, Tokles,” badlong ni Ana ngadto sa iyang bana kay nakita niyang mihilak na si Mercedita. “Wa tay mahimo, kon kanang lakiha maoy iyang gihigugma.”

Wala maggunok si Mercedita, tinuod bitaw ang tanan, apan gimahal niya si Makoy ug may nahitabo na gani kanila didto sa pangpang duol balay niini. Ug didto pud sa maong pangpang ilang gipanumpa nga way makababag sa ilang pagminahalay.

“Mananagat lang ko, Mercy, ug gamay pa gyud og kaalam,” dihay ganay sa pagmahay sa tingog sa ulitawo.

“Di ko igsapayan kon unsa ka man, Koy, ang importante alang nako nga tim-os ang atong pagminahalay. Ug dinhi ning pangpang, Koy, ipanumpa ko nga kon magbudhi ka nako, magpakamatay ko dinhi,” hinay ang tingog sa dalaga.

“Ako pud, Mers, anhi pud ko magpakamatay dinhi sa pangpang sa higayon nga imo akong pahilakon.” Unya, nag-akob ang ilang mga ngabil samtang ang mga balod milihok na alang sa iyang paglantong.

Apan ang panumpa gihimo aron lang pakyason kay si Mercedita gitakda na mang kaslon sa usa ka tiguwang dato ug biyudo. Kay mao kini gusto sa iyang mga ginikanan. Apan milighot si Mercedita nianang pagkalikodlikod na sa kasal. Midali siya’g adto sa pangpang ug didto ubos sa kahayag sa bag-ong misubang nga buwan iyang nakita si Makoy nga nagkupot na sa usa ka mahait nga punyal aron iyang itampok tumong sa iyang dughan, misinggit si Mercedita, “Makoyyy, ayawwww! Ayaw kana pagbuhata kay nia na ko. Dili ko magpakasal sa tiguwang biyudo, ug nia ko, magpahilayo ta dinhi sa atong balangay, dad-a ko bisag asa!”

Natagak ang punyal nga gikuptan ni Makoy ug iyang gigakos si Mercedita. Ug didto sa may lapyahan naglutaw na ang iyang baroto nga andam na nilang sakyan sa ilang pagpahilayo. (Kataposan)