Gula 100
“Diha ka lang kutob, Raval!” gisinggitan ni SPO1 Nicko Bernal ang hepe sa kapolisan, ang pangulo sa kulto’ng Bangkulisan, nga paingon na nga moikyas.
Apan mihana ang pangulo sa kulto pagpusil kang Nicko. Wala magpaalkanse si Nicko ug giunhan niya pagpusil ang hepe. Gihurot gayud niya ang mga bala sa iyang Uzi.
Unya nahilom ang buto-buto sa armas ug mibanos ang kahilom sa lasang apan nagpasad ang mga patay.
May mga polis ‘sab nga sakop ni Nicko nga nangaangol. Apan nahurot gayud nila’g patay ang mga miyembro sa kulto.
Gigakos ni Nicko ang iyang asawa ug anak. Nahinangop ug nalipay siya nga wala’y nahitabo nga dautan kanila.
Tungod sa maong hitabo, nakaangkon og dako’ng publisidad ang lungsod sa Tinago. Giduaw ang maong lungsod sa taga media. Si Nicko maoy nagkapuliki og tubag sa pangutana sa mga reporters.
Tungod sa kalampusan ni Nicko pagpuhag sa kulto sa lungsod sa Tinago, siya ang gitudlo sa PNP provincial director nga acting police chief sa lungsod.
Giusbawan ang ranggo sa mga polis nga alalay ni Nicko ug apil na ang mga polis nga miabag sa paglumpag sa kulto’ng Bangkulis Black Brotherhood.
Nagmalinawon na ang lungsod sa Tinago. (Kataposan)