Lain ‘sab nga hut-ong sa kapolisan ang gitahasan ni Chief Inspector Dindo Raval pagsuhid sa ubang kabarangayan. Gimando niya ang pagsiksik sa kalasangan sa kabarangayan sa lungsod sa Tinago. Gidetalye niya ang tanan niyang mga plano.
Human sa briefing, nanggawas na ang mga polis sa buhatan sa hepe aron mangita sa gitagoan sa mga sakop sa kulto nga Bangkulisan.
“Kitang duha ang magkuyog sa pagpatrolya, Nicko,” sa hepe pa. “Hulata una ko dinhi’g makadiyot.”
“Asa ka man diay, Sir?” ni Nicko. “Sa CR,” tubag sa hepe. “Sugo sa lawas.”
“Sige, Sir,” ni Nicko pa. Paabuton ta ka.”
Migawas ang hepe sa opisina ug miadto sa CR.
Wala madugay mibagting ang cellphone ni Nicko. Ang numerong 6666 ang nanawag. Gidali kini pagtubag ni Nicko. Nabati dayon niya ang tingog sa misteryosa nga babaye nga nagpailang pangulo sa mga Bangkulisan.
“Hayop ka,” ni Nicko pa nga wala makapugong sa iyang kalagot. “Hain ang akong asawa ug anak? Unsay imong gibuhat kanila?”
“Ayaw kabalaka,” sa babaye pa. “Dili na madugay, makita na nimo ang imong asawa ug anak.”
Ug naputol ang linya. Nakapangagho si Nicko nga gusto pa untang makigsulti sa misteryosong babaye. Misamot ang pag-alindaya karon ni Nicko. (Sumpayan)