Mibathay sa panagway sa upat ka babaye ang kamaya ug gisundan sa matam-is nga pahiyom pagkasayod nga gibayran sa lalaki nga kadungan nila’g kaon ang tanan nila nga gi-order.
“Birthday diay nimo karon sir? Maayo pa og mi-order ko’g daghan da kun nahibawo pa ko,” matud sa usa ka babaye nga mura’g maoy siawon kanilang upat.
“Wala’y problema. Bangkahan ko gihapon mo unya. What time ba ang inyong out?” gisukna ni Art ang mga babaye. Mitutok ni Art ang babaye nga guwapa ug maoy mitug-an sa oras nga mogawas na sila sa department store.
Giingnan ni Art ang mga babaye nga kay Sabado man karon, gusto niya nga mag-karaoke sila. Mipahiyom ang guwapa nga dalaga. “Sige day, manganta ta kay dugay na ko nga wala na makakanta da.”
Mitindog si Art gikan sa iyang lamesa ug mitupad sa mga babaye. Gitunol niya ang iyang tuo nga kamot ug mipaila sa iyang kaugalingon.
Una niya nga gitunolan ang guwapa nga babaye. “I’m Shane," paila sa guwapa. Gipig-it ni Art ang kamot sa dalaga nga mura’g naghatag og ideya nga nakagusto siya kaniya.
Nagkasabot sila nga anha maghuwat si Art sa kilid sa department store alas 7 sa gabii. Tuod, gipangandaman gayud ni Art ang ilang pag-karaoke.
Bisan dili niya tinuod nga birthday, apan andam siya nga mogasto aron lang iyang masuod si Shane. (Sumpayan)