“Congratulations, Rey,” ni sister Veronica.
“Sa unsa?” Pangutana ni Rey.
“Sa imong accomplishment,” ni sister Veronica pa. “Wala ka pa gihapon mausab. Usa gihapon ikaw ka maayong polis. Milampos ka sa paghipos sa mga karnaper ug na-recover mo pa ang sakyanan nga ilang gikawat.”
“Katungdanan ko ang pagbuhat niadto, sister Veronica,” ni Rey pa. “Gisuweldohan gud mi sa gobiyerno aron maoy makapanalipod sa mga magbubuhis.”
“Talagsaon ang sama kanimo, Rey,” nakaingon si sister Veronica. “I’m mighty proud of you.”
“Thank you.”
Ug gibutang na nila ang awditibo.
Human sa panagsulti nila ni sister Veronica, giinstruksiyonan ni Rey ang iyang mga kaubang polis nga maoy mahibilin sa presinto aron pag-duty hangtod sa gabii. Mopauli siya’g sayo karon.
Nagtutaghoy si Rey nga migawas sa presinto. Apan sa didto na siya sa daplin sa dalan, kalit siyang nakaiktin sa dihang may awto nga mihagiyos nga kalit kaayong mihunong sa iyang tungod.
Nahasibog siya. Nanukad ang iyang mga tiil samtang ang iyang walang kamot andam na sa pagbunot sa .45 kalibre nga gisuksok sa iyang hawakan. Nagtuo siya nga daotan og tuyo kaniya ang nagsakay sa awto. -- Taposan sunod gula