Sa dihang nalantawan na ni Corporal Benturada ang iyang balay, mipaspas siya paglakaw. Karaan na ang balay nga iyang gipuy-an. Kabilin pa kini sa namatay niyang mga ginikanan. Tulo sila ka managsuon. Naminyo na ang duha niya ka magulang ug may kaugalingon nang balay. Sanglit siya ang wala pay kapikas sa kinabuhi, siya ang gipapuyo sa balay sa ilang mga ginikanan. Nag-inusara lang siya sa maong balay.
Sa paghimuntog ni Corporal Benturada sa tungod sa pultahan, kalit lang siyang napahunong. Mitingkag ang iyang mga dalunggan pagkamatikod nga nagkang-a ang sera sa pultahan. Naabli! Gikalit niya pag-ibot ang iyang side arm. Mikuba ang iyang dughan. Miliraw ang iyang mga mata sa palibot.
Unya gihinay niya’g tukmod ang palid sa pultahan. Misulod siya nga mainampingon. Hugot niyang gigunitan ang iyang armas. Sa sala, sa may sopa, may nakita siyang bulto sa bayhon sa usa ka tawo nga naglingkod. Gidali niya’g pasiga ang sugang dagitabnon. Pagbuhagay sa kahayag sa palibot, nakugang siya sa dihang iyang nailhan ang tawo nga naglingkod sa sopa. Si Rey!
Dili tiaw ang gibating kahikugang ni Corporal David Benturada pagkakita kang SPO3 Rey Corpuz nga naglingkod sa sopa sulod sa iyang balay. Wala siya magdahom nga ang tinugyanan sa balaod nga tibuok adlaw nilang gipangita gumikan kay kini milayas gikan sa tambalanan ania na diay sa iyang balay. -- Sumpayan pa