Gikahinabi gayod ni sister Veronica si Capt. Benale. Wala na maglikoliko pa ang madre sa iyang tuyo. Iyang gisuginlan ang kapitan nga si Rey nawala sa hospital. Nakurat ang kapitan sa iyang gitaho.
“Karon dayon moanha ako sa tambalanan, sister Veronica,” nagkanayon ang kapitan.
“Paaboton ko ikaw, kapitan,” ni sister Veronica.
Human sa ilang panagsulti, si sister Veronica mibalik gilayon ngadto sa tambalanan. Niining tungora, nagpadayon pa ang taga hospital sa pagpangita sa nawala nga pasyente nga si Rey. Gilukop nila’g suhid lakip ang mga pribadong dapit, mga CR ug uban pang mga dapit nga wala’y tawo nga nagpuyo sulod sa compound sa tambalanan.
Apan wala gayod nila makaplagi si Rey. Mibati og dili tiaw nga kabalaka si sister Veronica sa nahitabo. Nahingawa siya sa kahimtang ni Rey. Luya pa kini kaayo. Wala pa maalim ang mga samad.
Nabalaka siya kun unsay mahitabo kang Rey karon nga mihinok kini paggawas sa hospital bisan og wala pa kini baliki sa hingpit nga kabaskog sa lawas.
Wala dangti’g tunga sa takna, nahiabot si Capt. Sancho Benale sa tambalanan. Kuyog sa kapitan si Corporal Benturada ug laing duha ka polis nga wala mailhi ni sister Veronica. Misugat gilayon ang madre kanila. -- Sumpayan pa