Hingpit kong nagpaulipon pagbalik sa kahuyang ug kahangol sa lawasnong kalipay. Nakakat-on ko sa pagpamakak ngadto sa akong mga ginikanan aron lang makalusot ko sa pagpakigtagbo kang Raffy. Nakamatikod ko nga mora’g nagduda na sila si Papa ug Mama sa akong mga lihok apan nag-amping gyud ko’g maayo nga dili nila hisakpan.
Usa ka higayon niana, gidala ko ni Raffy sa usa ka matahom nga beach resort sa Argao, mas maayo didto kay dili daghan og tawo kay medyo sudlonon man kini.
Mikuha mi’g cottage sa maong beach resort. Serado ang cottage ug kompleto sa amenities. Didto gigugol namo ang mga takna pagtagay sa lawasnong kalipay sa tuyo nga matagbaw ug matambalan sa hingpit ang tagsatagsa namo ka panginahanglan.
Mora mi’g mga bag-ong gikasal nga nag-honeymoon didto sa Argao. Tungod kay layo na man mi sa among dapit, wala mi mabalaka nga may mga kaila kami nga makakita namo nga nag-uban. Mao nga kompiyansa kaayo mi nga nagpasayasaya tungod kay pulos man sab dayo ang mga tawo didto.
Intero adlaw ming miistar sa usa ka cottage sa usa ka beach resort sa Argao. Tibuok adlaw nga wala mi laing gihimo gawas sa paglulinghayaw ug inigbalik namo sa cottage, magtagbaw mi pagsalo sa lawasnong kalipay. Ug pagkahapon, namauli na kami ngadto sa Barili.
Nagpadayon ang kinawatkawat nga panagtagbo namo ni Raffy. Managsama ming naulipon pag-ayo sa kaulag. Nawad-an ko’g kontrol sa akong kaugalingon ug dili gyud makabalibad sa hulhog sa tentasyon. -- Sumpayan pa