Pañeros, Gilas Defenders, Idols mikastigo sa mga kontra

CEBU, Philippines — Ang Pañeros miinat sa mainit nilang ratsada ngadto sa upat ka duwa samtang ang Gilas Defenders ug Sub Zero Idols mikadlit sa ikatulo nilang daog sa Integrated Bar of the Philippines (IBP)-Cebu Basketball League niadtong weekend didto sa Capitol Parish gym sa dalan Escario, dakbayan sa Sugbo.

Si Daanbantayan councilor Gilbert Arrabis, Jr. mipabuto og 21 puntos uban ang lima ka rebounds sa dihang gilampornas sa Pañeros ang Aniceta Vipers, 76-54, aron pahugtan ang ilang pagkupot sa solong liderato bitbit ang perpektong 4-0 nga marka.

Sukwahi kaayo ang nadangatan sa Vipers nga nasugamak sa ikaupat nilang sagunson nga pilde.    

Si Tope Ang mikuha sab og atensiyon human siya milansang og lima ka 3-pointers sa iyang 19 puntos nga iyang gipalamanan  og lima ka assists sa dihang gipasurender sa Gilas Defenders ang Rebels, 73-46.   

Si DPWH legal officer Din Padoga migaling og 20 puntos ug walo ka rebounds apan nakawang ang labing nindot niyang salida sa liga alang sa Rebels.

Sama sa Pañeros, ang Idols miinat sa ilang record ngadto sa 3-1 human gidemolis ang YLAC, 82-57, salamat ni 411 BPO consultant James Jabil nga mipupo og 21 puntos ug tulo ka steals. Si Jabil giabagan ni Francis Pepito nga mitali og 16 puntos.

Si Matthew Velez dunay 15 puntos ug tulo ka assists sa pilderong YLAC.

Sa laing resulta, sila si Mat Eric Medalle ug Redemptor Regis parehong mirehistro of 16 puntos aron pangulohan ang Spartans ngadto sa 77-68 nga pagpakaging sa Badboys sa labing unang duwa nga milanat og overtime ning season.

Si Medalle sab maoy nakapuwersa og dugang singko minutos sa aksiyon human miposa og krusyal nga tres sa hilimatyong segundos sa regulasyon.

Ang Badboys, nga gipangulohan nilang Edwin Estorgio, Kenneth Kernn Sesante ug Richard Bauzon nga nagkumboya'g 40 puntos, mao unta ang nagkontrola sa duwa gikan sa pagsugod apan nawad-an sila og kontrol taliwala sa madasigon nga hagit sa Spartans sa katapusang kuwarter. Nasamotan pa ang Badboys kay wala sila maka-iskor sa overtime.