Final 4 sa Elite Basketball Club kumbatihan na
CEBU, Philippines — Ang Falcons, Bears, Eagles ug Rhinos maoy mag-engkuwentro sa Final Four sa Elite Basketball Club Cebu Season 18 nga duwaon karong adlawa didto sa Casals Village gym sa Barangay Mabolo, dakbayan sa Sugbo.
Si Christian Floyd Taboada mitali og 29 puntos, lima ka rebounds ug tulo ka assists samtang si Barok Ceniza midugang og 17 puntos, lima ka rebounds ug tulo kja assists sa dihang gitagak sa Falcons ang Hogs, 93-90.
Miamot si Chris Bernard Regero og 13 puntos, unom ka rebounds ug upat ka blocks alang sa Falcons, nga makigharong batok sa Bears sa semifinals karong alas 7:30 sa gabii.
Ang Bears mi-abante human gipalagpot ang Vipers, 90-82.
Si Sam Hermosa maoy nangu sa Bears uban ang 22 puntos, 11 ka rebounds ug upat ka assists. Si Zylle Cabellon midonar og 17 puntos, unom ka rebounds, lima ka assists ug upat ka steals samatng si John Velasco mikimada og 12 puntos ug lima ka rebounds.
Sa laing sangka sa semis nga gikatakda sa alas-6 sa gabii, mag-abot ang Eagles ug ang Rhinos. Ang Eagles mipabakasyon sa Wolves, 105-97, samtang gipalayas sa Rhinos ang Raptors, 112-104.
Si RJ Dinolan ang bida sa Eagles bitbit ang 28 puntos, 11 ka rebounds ug lima ka assists ug gisundan kini ni John Abad nga dunay 17 puntos, duha ka rebounds, walo ka assists ug tulo ka steals, Nagparamdam sab si Ian Ortega uban ang 13 puntos alang sa Eagles.
Sila si Ruben Ludovice, Jake Diamante ug Shane Menina maoy mikuha og atensiyon sa Rhinos. Si Ludovice miposte og 26 puntos ug 25 ka rebounds samtang sila Diamante ug Menina parehong mikadlit og 25 puntos gawas nga nagkumboya og siyam ka rebounds, 11 ka assists ug upat ka steals.
- Latest
