Pambato sa Dipolog gidominar ang mga Sugbuanon sa ZaNorte Kasa Kaza Super Kickboxing

CEBU, Philippines — Napakyas ang mga Sugbuanong mixed martial artists sa pagpanulong nila sa teritoryo sa ilang kontra human sila gipayaka sa mga pambato sa dakbayan sa Dipolog atol sa eksplosibo kaayong Kasa Kaza 2022 Festival Super Kickboxing card nga gisaksihan sa bagang duot sa mga fans niadtong Huybes sa gabii sa Zamboanga del Norte Sports Complex sa Dipolog.

Unang nahagba si John Lano, nga gipa-undang sa ikaduhang hugna ni Art Marquez sa DBG Team. Ang mga katropa ni Lano sa Lapu-Lapu City Striker MMA nga sila si Kim "Super Jet" Bisbal ug Isaac "One Punch" de la Cruz nakahiagum sab og susamang kapalaran.

Si Bisbal miyukbo ni Bryle "The Notorious" Osaraga sa MCM MMA Team.

Gipasukarap unta sa 24 anyos nga si Bisbal si Osaraga gamit ang makakusog nga backfist strike sa tunga-tungang bahin sa ikatulo ug katapusang hugna apan si Osaraga, nga klaro kaayong nagkalipong-lipong pa, nakalingkawas sa malisud nga sitwasyon dayon na ngadto sa pagkubit og daog pinaagi sa unanimous decision.

Sa kulbahinam sab nga main event, si De la Cruz gipatikangkang sa garbo sa Dipolog nga si Jude "Wonder Boy" Jaictin nga miyembro gihapon sa MCM Ariana MMA.

Si Jaictin milusad og bangis nga kombinasyon sa solidong mga suntok ug hait nga knee strikes sa ulo ug tiyan aron palukapahon si De la Cruz sa hingpit sa oras nga 2:18 sa ikaduhang hugna.

Giorganisa sa FMC (Full Metal Clash)-Combat Sports sa Dipolog pinaagi sa mga direktor niining sila si Ivan Stranahan ug Rhandolf Sindo inabagan sa Deep Dream Events Managment Services, ang eksplosibong pasundayag  kabahin sa serye sa mga paugnat sa kusog nga gilinyada aron pagdugang og lamas sa labing unang Kadaugan sa Katawhan sa ZaNorte kon Kasa Kaza Festival ning progresibong habagatang probinsiya sa Pilipinas.

Gipasiugdahan kini ni Zamboanga del Norte Governor Rosalina "Nanay Nene" Jalosjos aug Dapitan City Tourism chief Apple Marie Agolong.

"This is part of our aggressive drive to drum up sports tourism in the province of Zamboanga del Norte," matud pa ni Agolong.

"I know that there are a lot of potentials in our place that just needed to be tapped that is why we are holding more activities for them to showcase their talents. Who knows they will make it big someday in their respective fields especially in this discipline (MMA)," dugang pa ni Agolong nga kanhi konsehal sa Dapitan sud sa tulo ka sagunson nga termino. Gawas sa kickboxing, duna say marathon, beach volleyball, lawn tennis, night morocross, mountainbike challege ug golf nga naglangkob ning usa ka semanang kalihukan nga tak-opon karong adlawa, Hulyo 2.