LA Lakers dunay bag-ong coach
CEBU, Philippines — Si Darvin Ham, nga nagsilbeng assistant coach sa Milwaukee Bucks sud sa upat ka tuig, gikuha nga head coach sa Los Angeles Lakers.
Sigun sa taho sa ESPN ug The Athletic, si Ham gipapirma og upat ka tuig nga kontrata sa Lakers.
Si Ham mohulip sa dapit ni Frank Vogel, nga gitagak sa Lakers sa miaging bulan human ang Lakers wala makasud sa NBA playoffs uban ang 33-49 nga baraha.
Ang superstar sa Lakers nga si LeBron James mipadayag dayon sa iyang suporta sa gihimong lakang sa ilang koponan.
"So damn EXCITED!!!!!!!! Congrats and welcome Coach DHam!!" suwat pa ni James sa iyang Twitter.
Ang 48-anyos nga si Ham kaduha na nakampiyon sa NBA. Una, isip player sa Detroit Pistons niadtong 2004 ug ikaduha, isip assistant coach sa Bucks sa miaging tuig.
Nagsilbe siyang assistant coach sa Lakers niadtong 2011-2013 ug dayon migahin sa sunod nga lima ka tuig isip assistant sa Atlanta Hawks sa wala pa misunod ni coach Mike Budenholzer sa Bucks niadtong 2018.
- Latest