Penthel First 5 kampiyon sa unang CBL season

CEBU, Philippines — Ang Penthel First 5 Lounge milampornas sa Eye Browse Optical, 73-53, aron paglugwa nga kampiyon sa labing unang Cebu Basketball League (CBL) season nga giulohan og Bruno's Cup niadtong Domingo sa gabii didto sa Sacred Heart Center Sports Club.

Si Danilo Contado, Jr. mipatuasik og 24 puntos uban ang tulo ka rebounds ug tulo ka steals alang sa Penthel First 5 hinungdan nga siya maoy gibayaw nga Finals Most Valuable Player.   Wala na molingi pa ang Penthel First 5 sukad miposte og 19-12 nga labaw human sa unang 10 minutos sa aksiyon.

Abante lamang og sayes puntos sa halftime, ang Penthel First 5 mikastigo sa Eye Browse Optical sa ikatulong kuwarter, 18-11, sa wala pa gitak-op ang duwa pinaagi sa 22-15 run nga miresulta ngadto sa 20 puntos nga demolisyon.

Ang season MVP nga si Christian Gallarde mibugha og 15 puntos, lima ka rebounds ug tulo ka assists apan nakawang ang iyang paningkamot sa habig sa Eye Browse Optical.

Giorganisa ni Mardion N. Delima, nga nagsilbe sab nga commissioner sa liga, ang CBL misikad niadtong Pebrero 2020 apan kalit kining nahunong sud sa duha ka tuig tungod sa kalibutanhong pandemiya. Nahimo kining posible tungod sa suporta sa Bad Beat, Print Ideas, ug Team Bruno Motorparts and Accessories.

"I think this is the longest league in Cebu kay nag-start mi February 2020 unya karon pa nahuman tungod sa Covid," matud pa ni Delima. "Pasalamat ko sa akong mga partners nga sila si Ricky Almasa ug Edward Bia kay dili ni ma-successful among liga kung wala sila." —EBV