Butler nagdala og kainit sa Heat
CEBU, Philippines — Si Jimmy Butler mipabuto og 41 puntos sa dihang gipayaka sa Miami Heat ang Boston Celtics, 118-107, sa pasiunang duwa sa ilang best-of-seven NBA Eastern Conference Finals kagahapon didto sa FTX Arena sa Miami, Florida.
Namugnaw ang Heat sa sayong bahin sa aksiyon hinungdan nga nabiyaan sila og otso puntos sa halftime, 54-62, apan tungod sa pagmangtas ni Butler, milusad sila og nagkayong
22-2 rally aron pagposte og 12 puntos nga bentaha, 76-64, dayon na ngadto sa pagpatikalbong sa Celtics.
Sa kinatibuk-an, gilampaso sa Heat ang Celtics sa ikatulong kuwarter, 39-14.
"Jimmy just inspired everybody in that third quarter," matud pa ni Heat coach Eric Spoelstra agi'g pagdayeg ni Butler.
Ang Celtics nakasikit ngadto na lamang sa tres puntos, 73-76, apan didto ra sila kutob gumikan kay midilaab og balik ang opensiba sa Heat aron paburoton pa ang ilang labaw ngadto sa 20 puntos.
Si Butler naka-angkon og igong suporta gikan nilang Tyler Herro ug Gabe Vincent nga nagkumboya og 35 puntos.
Bisan og wala ang duha nila ka sinaligan nga sila si Marcus Smart ug Al Horford, nindot ang gipakitang labok sa Celtics sa sinugdanan diin sila milabaw og 13 puntos luyo sa pagpanginit ni Jayson Tatum nga mitali og career-high 21 puntos sa nag-unang duha ka kuwarter.
Apan ang kampo sa Boston mikolapso taliwala sa mainit nga resbak sa Heat sa second half.
Ang Game 2 sa ilang serye gikatakda karong Biyernes didto gihapon sa korte sa Heat.
- Latest
