'Splash brothers' mibida sa Warriors

CEBU, Philippines — Si Klay Thompson mi-iskor og 21 puntos samtang si Stephen Curry midugang og 18 puntos sa dihang gilampaso sa Golden State Warriors ang Detroit Pistons, 102-86, sa NBA kagahapon didto sa Chase Center sa San Francisco, California.

Nasipyat si Thompson sa nag-una niyang duha ka itsa sa wala pa mi-andar ang makina sa iyang opensa samtang si Curry, nga mibalik human makapalta og usa ka duwa, naka-igo og unom sa 11 niya ka tira apil na ang upat ka 3-pointers. Si Curry duna say walo ka assists.

Wala sab magpabitin si Andrew Wiggins nga mikimada og 19 puntos alang sa Warriors, nga milansng og unom ka tres aron pagposte og 11 puntos nga labaw, 33-22, human sa unang kuwarter.

Misamot pa ang kainit sa Warriors sa ikaduhang kuwarter diin ilang gilabhan ang Pistons, 33-16, aron pag-inat sa ilang labaw ngadto na sa 28 puntos sa halftime, 66-38. Wala na nila paginghawaa pa sukad niadto ang Pistons.

Si Rodney McGruder mirehistro og 19 puntos samtang si Isaiah Stewart mitali og 14 puntos ug 11 ka rebounds alang sa Pistons nga nakatilaw na sab og makapadismaya nga kapildihan human sila gikastigo sa Phoenix Suns, 131-108, didto sa ilang korte.