Wolves gitukob ang Warriors

CEBU, Philippines — Si Karl-Anthony Towns mibugha og 26 puntos ug 11 ka rebounds aron pangulohan ang Minnesota Timberwolves ngadto sa 119-99 nga demolisyon sa Golden State Warriors, nga miduwa nga way ang bitoon niining si Stephen Curry sa NBA kagahapon didto sa Target Center sa Minneapolis, Minnesota.

Mihimo sab og kasikas sila si Jaylen Nowell ug Malik Beasley nga nagkumboya og 33 puntos alang sa Timberwolves nga milubong sa Warriors, 40-19, sa pinal nga 16 minutos sa aksiyon aron kuliton ang ika-21 nilang daug.

Sila si Jordan Poole ug Jonathan Kuminga nagkumbinar og 39 puntos sa Warriors nga naparot sa ikalimang higayon sa miagi nilang pito ka duwa.

Didto sa Detroit, si Devin Booker mipabuto og 30 puntos samtang si JaVale McGee midugang og 20 puntos sa dihang gilampornas sa Phoenix Suns ang Detroit Pistons, 135-108.

Init kaayo si Booker nga mipasud og 11 sa nag-una niyang 14 ka itsa.

Wala sab magpabitin si Cameron Payne nga mikadlit og 20 puntos alang sa Suns nga mipahugot sa ilang pagkupot sa solong liderato bitbit ang 33-9 nga baraha.

Ang rookie nga si Cade Cunningham ug si Cory Joseph parehong mitali og 21 puntos alang sa pilderong Pistons.

Sa laing resulta, si Rudy Gobert mihipos og 18 puntos ug 19 ka rebounds sa iyang pagbalik sa lineup sa Utah samtang si Donovan Mitchell mitimbre og 31 puntos sa dihang gipayaka sa Jazz ang Denver Nuggets, 125-102.

Si Bojan Bogdanovic mitapos uban ang 21 puntos aron tabangan ang Jazz nga pakgangon ang upat ka sunod-sunod nilang pilde.