Tropang Giga 3-1 ang tirada, Hotshots naglaraw makatabla

CEBU, Philippines — Sa gihapon, managlahi ang tumong sa TNT Tropang Giga ug Magnolia Hotshots sa ilang panag-abot sa Game 4 sa 46th PBA Philippine Cup best-of-seven finals karong adlawa didto sa Don Honorio Ventura State University gymnasium sa Bacolor, Pampanga.

Tuyo sa Tropang Giga nga inaton ang ilang labaw ngadto sa 3-1, samtang ang Hotshots naglaraw nga makatabla sa dihang magsangka na sab sila karong alas-6 sa gabii.

Ang TNT maoy midaog sa nag-unang duha ka duwa sa serye, apan ang Hotshots nakabawos sa Game 3, 106-98.

Makapadasig kaayo ang maong daog sa Magnolia gumikan kay wala pa may team nga nakabangon human masagunsoni og tulo ka pilde sa usa ka serye sa kasaysayan sa PBA.

Dakong rebelasyon sa Magnolia si Jio Jalalon nga nindot ang gipakitang labok human gisal-ot ni coach Chito Victolero sa ilang starting five tungod sab sa hangyo ni Mark Barocca nga dunay gipamati sa iyang lawas.

Gawas nilang Jalalon ug Barocca, ang Hotshots magsandig sab nilang Paul Lee, Ian Sangalang, Calvin Abueva, Rome de la Rosa ug Jackson Corpuz aron makab-ot ang gitinguha nilang putlon ang serye ngadto na lang sa best-of-three.

Napadak-an gamay ang tsansa sa Hotshots nga usban og parot ang TNT gumikan kay dili man makaduwa ang usa sa mga sinaligan sa Tropang Giga nga si Troy del Rosario gumikay kay dunay angol.

Dili sab hinoon gihapon kakompiyansaan ang linyada sa Tropang Giga nga gilangkoban nilang Mikey Williams, Jayson Castro, Kelly Williams, Poy Erram, RR Pogoy, Brian Heruela, ug Ryan Reyes.