LeBron, Lakers malaumon makabalik sa kampiyonato

CEBU, Philippines — Si LeBron James ug ang Los Angeles Lakers masaligon nga makataak sila og balik sa kampiyonato ning 2021-22 NBA season nga magsugod na ugmang adlawa. Usa ka tuig ang milabay, ang Lakers ubos sa pagpangu nilang James ug Anthony Davis misakmit sa ika-16 nilang korona sa NBA human gidominar ang “bubble play” sa liga didto sa Orlando, Florida.

Apan sa miaging season, ang Lakers kutob lamang sa unang hugna sa playoffs. Wala mosaler ang ilang gahum ilabi na kay sila si James ug Davis gihamok og mga injury.

Kampante hinoon si James nga ang taas-taas nilang pahuway makatabang og dako pagpabalik sa ilang kalagsik ug kondisyon alang ning lab-as nga NBA season.

Dugang niini, misamot pa og kalig-on ang puwersa sa Lakers ning higayona tungod sa pag-abot sa laing All-Star sa ilang poder nga si Russell Westbrook.

Gawas ni Westbrook, lain pang mga bag-ong sakop sa Lakers mao sila si Rajon Rondo, DeAndre Jordan, Kent Bazemore, Carmelo Anthony, ug Trevor Ariza.