Sugod na ang init

Si Manila City Mayor Isko Moreno maoy ikaluto ug labing bag-o nga miitsa sa iyang kalo ngadto sa politikanhong kumbati alang sa pagkapresidente sa Pilipinas sa nasyonal nga eleksiyon sa Mayo sa sunod tuig.

Sa niaging semana, gidawat usab ni Senador Manny Pacquiao ang nominasyon sa iyang partido – ang PDP-Laban Pimentel wing ug People’s Champ Movement – nga nag-awhag kaniya pagdagan pagkapangulo sa umaabot nga piniliay.

Nauna nang mideklara sa iyang intensiyon pagkandidato pagkapresidente si Senador Panfilo Lacson uban ni Senate President Tito Sotto nga maoy iyang bise presidente. Kon madayon, ikaduha na kini nga pagdagan si Lacson alang sa labing taas nga posisyon sa nasud.

Aduna pay mga personalidad nga nagpahipi ug andam nga mosaka sa ring alang sa umaabot nga bugnong lugaynon. Ug ato usab nga atngan kon kinsa gayud ang ituboy sa Liberal Party, ang nag-unang oposisyon sa nasud.

Andam kuno si Bise Presidente Leni Robredo nga modagan pagkapresidente kun maoy ituboy sa united opposition. Apan sa akong tan-aw, hanap pa sa dies panas kon magkahiusa ang tanang grupo sa oposisyon kon atong basihan ang kasamtangang kamada.

Si kanhi senador Bongbong Marcos gituboy usab sa iyang partidong Kilusang Bagong Lipunan nga maoy ilang manok alang sa pagkapangulo. Apan wala pa matino kon kinsa gayud ang magpresidente sa ilang tandem ni Davao City Mayor Sara Duterte.

Ang nakapaisa sa kilay mao ang plano nga pagdagan ni Presidente Rodrigo Duterte pagkabise presidente. Ambot kon modayon ba kaha gayud ang presidente sa iyang intensiyon o usa ba lamang kaha kini ka lansis.

Nagsugod na gyud ang init sa politika alang sa Mayo sa sunod tuig. Ug niining umaabot nga mga adlaw, mas mobokal pa unya ang takuri, ilabina kon magsugod na’g linabayay og lapok kining mga kandidato panahon sa kampanya.