BBM-Toni talks makatandog

Tulo ka oras pa lang nga na-post sa You Tube channel ang ‘The Greatest Lesson Bongbong Marcos Learned From His Father’ ubos sa tonitalks interview nga gidumala ni Toni Gonzaga, nasangit dayon akong atensiyon sa maong dugokan.

Dihadiha, akong giablihan. Ug nakita si kanhi Senador Bongbong Marcos (BBM) nga gisukitsukit sa iladong host, Toni Gonzaga.

Dihang gipangutana si BBM ni Toni kon disiplinariyan o estrikto ba si anhing Pamuno Ferdinand E. Marcos (FEM) kanilang mga anak, giklaro ni BBM nga oo, disiplinariyan iyang erpat, pero kanunay gyod siyang pahinumdoman nga: “study hard and work hard.”

Usab, nahisgotan ni Bongbong kadtong gihatod siya sa iyang amahan sa eskuylahan panahon sa iyang birthday, diin gipakyaw pagpalit sa daddy niya ang tanang ice cream. Ug gipakaon kini sa tanang bata ug klasmets niya.

Miangkon si Bongbong, suwerte siya nga nakaamahag presidente sama ni FEM, kinsa giyukboan sa kanasoran. Gani, bata pa, nakahawok na siyag palad sa mga Santo Papa ug nakahimamat sa mga dagkong lider sa nagkalainlaing nasiyon.

Apan nahibulong, nganong iyang daddy, kinsa nailhan niyang usa ka maayong mangangalagad, gikasilagan gihapon sa katawhan? “I don’t know why they hate my Dad?”

Hangtod nga miabot sa punto, diin gipangutana siya ni Toni, unsay gihimo ni FEM dihang nagubot na ang EDSA tungod sa People’s Power?” Si Bongbong mitubag, nga gigamit ni FEM ang obligasiyon sa usa ka commander-in-chief sa kinatibuk-ang kasundalohan. Gani, gitahasan siyang  maoy mangulo pagdepensa sa Malakanyang.

Pero dihang iyang gipahibalo si FEM nga: “Yong kalaban, ginigiyera na tayo,” diin andam na si Bongbong makigkombati, igo lang siyang gipahinumdoman sa  amahan: “I have spent my whole life defending Filipinos. I cannot hurt them now.” Ug gimandoan siya ug tanang heneral: “Put your guns down and we’re not shooting anyone.” Hinungdan, nga napugngan ang dugoong hitabo sa nawong sa Edsa.

Ingon niini diay kamahal ni FM ang iyang nasod ug katawhan. Pagmahal nga dili makita sa Philippine History books. Apan atong nadungog gikan sa usa ka anak, kinsa buhing kamatuoran, nga nakasaksi-sinati sa tiunayng pagkatawo sa iyang amahan hangtod sa pagtaliwan niini.

Milyong netizen ang nakahilak samtang nagtan-aw sa maong BBM-tonitalks interview. Hasta ko, dughan nagpuot!