Drug den gironda sa PDEA

CEBU, Philippines — Tulo ang nasikop atol sa gibungkag nga drug-den sa buy-bust operation nga gipahigayon sa mga tinugyanan sa Philippine Drug Enforcement Agency Cebu Provincial Office uban sa Labangon Police Station sa Sitio Sto. Niño A. Lopez Street, Barangay Labangon ning Dakbayan sa Sugbo.

Ang nasikop mao ang gialegar nga tigmintenar sa drug den nga si Oliver Dela Cerna, 42, construction worker, igsuon niining si Diane Dela Cerna,41, walay trabaho nga naaktohan nga nagsuyop og shabu sulod sa maong drug den kauban ang parokyano nga si Carlo Teofilo, 18.

Nasakmit gikan sa mga dinakpan ang 11 ka putos sa gituohang shabu nga motimbang og 15 gramos nga mobalor ug 15 gramos nga nagkantidad og P102 mil, buy-bust money, kwarta nga P200 nga kita sa abang sa drug den ug kagamitan sa pagsuyop.

Matud pa ni Leia Alcantara, tigpamaba sa PDEA-7 dunay concerned citizens nga mihatag kanila og impormasyon bahin sa drug den sa mga suspek diha sa maong lugar. Ang maong suspek giingong makadispatsar og 50 ngadto sa 100gramos sa gituohang shabu.

Ang maong dinakpan giandam na karon og pagpasang-at sa tukma nga kaso nga kalapasan sa Section 5, 6, 7, 11, 12, and 15, Article II of RA 9165.

Gihingusgan sa maong ahensya ang pagbungkag sa maong mga drug dens human kini maoy breeding grounds sa kagubot ug kriminalidad nga maoy makaguba sa peace and order sa komunidad.

Sa laing operasyon, nasakmit sa kapolisan sa Presinto 1 sa Mandaue City Police Office (MCPO) ang 70 gramong gituohang shabu nga nagkantidad og P476 mil base sa Dangerous Drug Board (DDB) value niini gikan sa High Value Individual (HVI) nga pusher og shabu nga ilang nadakpan sa buy bust operation nga ilang gipahigayon sa compound sa Cebu International Convention (CICC) sa Barangay Guizo sa Siyudad sa Mandaue.

Si Police Major Michael Roque, hepe sa Police Station 1 sa MCPO maoy nangulo sa buy bust operation nga hinungdan sa pagkasikop ni John Ivan alyas Alvin, 20, nagpuyo sa maong dapit

Si Roque miingon nga dunay nakatug-an kanila bahin sa pagpamaligya niini og ilegal nga drugas.

Dugang pa ni Roque nga maong buy bust operation nga ilang gihimo ubos usab sa koordinasyon sa Philippine Drug Enforcement Agency (PDEA) 7.

Giingong mohalin kini og shabu nga kapin sa usa ka kilo nga shabu sa matag semana. — /IBM (BANAT NEWS)