Ayaw balik-balika

Dear Tito Miguel ,

Maayong adlaw! Ako diay si Klarise, taga Barangay Guadalupe, Cebu City.  Upat ka tuig na ang relasyon namo ni RJ. Akong problema kay dili gyud magpapugong si RJ sa iyang bisyo sa tagay. Palahubog kaayo uy, bisan unsaon og badlong, dili jud mopatuo. Unsaon mani nako, Tito Miguel? Thank you kaayo! —Klarise

Klarise,

Lisod usbon ang naandan diha diha dayon, labi na ang bisyo kay lagmit usa na kini ka addiction. Kun alcoholic na, kinahanglan na modangop sa mga eksperto aron siya matabangan. Sa imong bahin, sultihi sa maka-usa pa nga wala ka kauyon sa iyang bisyo, kay makadaut sa iyang lawas, gawas pa nga dako’g gasto. Apan ayaw pugngi. Wala ka maghisgot kapila siya moinom. Hangyoa lang nga ibanan. Kun adlaw-adlaw, mahimo lat-ang lat-angan. Ang labing maayo ug rasonable kay kausa mata’g semana. Ilabi na kun walay trabaho sunod adlaw o dili ba kaha kun dunay okasyon, agi’g premyo sa iyang kaugalingon human sa usa ka semana nga trabaho.

Ayaw balik-balika imong istorya, basta nasulti na nimo kausa imong pagdumili’g gibati nga kaguol. Paniid lang unsa iyang buhaton, aron imong masusi kun maminaw nimo o mosamot hinuon. Diha nimo makita asa ka dapit sa iyang kinabuhi’g prayoridad.

Kun walay epekto imong hangyo niya, lagmit kaniya imong pagbati’g opinyon walay kuwenta. Kaya ba nimo agwantahon ang maong karelasyon? Ayaw’g pugngi o awaya, aron makita nimo unsa siya, unsa iyang gusto buhaton ug kinsa iya gusto kuyogon.

Kay kun dili ikaw ang kaniya makalingaw ug makatagbaw, ayaw ipugos imong kaugalingon. Kana bitaw mga asawa nga ihikaw ang kuwarta sa bana aron dili mamabaye, giilad ra nila ilang kaugalingon. Ilang bana wala tuod mangita’g lain, dili tungod kay wala silay laing gusto, wala lang silay ikagasto. —Tito Miguel

Magpatambag ka? Ipada kang Tito Miguel: 0998-581-5856