CEBU, Philippines — Gipahibalo sa Department of Energy (DOE) ang laing rollback sa presyo sa lana sugod karong semanaha apan gipasidan-an gihapon ang publiko nga magmatngon tungod kay ang nagpadayon nga tensiyon sa Middle East mahimong mosangpot na usab og pagsaka sa presyo sa lana sa kalibutan.
Atol sa virtual press conference kagahapon, si DOE Secretary Sharon Garin nagkanayon nga sugod karong adlawa mokunhod og P0.73 ang presyo sa matag litro sa gasolina, P0.60 matag litro sa diesel ug P2.09 matag litro sa kerosene.
Matud ni Garin nga bisan og dili dako ang rollback apan dako gihapon kini og tabang aron mamenosan ang gasto sa mga pamilyang Pilipino, mga drayber sa pampublikong sakyanan, mga mag-uuma ug gagmay’ng negosyante.
Apan nipasidaan si Garin nga nagpabiling delikado ang sitwasyon sa Middle East ilabina kon mosamot pa ang tensiyon nga naglambigit sa Estados Unidos, Iran ug Israel nga mahimong hinungdan sa laing pagsaka sa presyo sa lana sa tibuok kalibutan.
Giawhag ni Garin ang publiko nga magpadayon sa pagdaginot sa konsumo sa gasolina ug elektrisidad samtang wala pa’y permamente’ng solusyon sa maong panagbangi.
Nunot niini, nisaka ang presyo sa liquefied petroleum gas (LPG) niining buwana ug gipasalig sa kalihim nga igo ug lig-on ang suplay sa LPG sa nasud.
Gibutyag ni Garin nga gitun-an karon sa DOE ug sa Philippine National Oil Company (PNOC) ang pagtukod og Philippine Strategic Reserve, usa ka pasilidad sa gobiyerno alang sa pagtipig og suplay sa petrolyo aron mapalig-on ang energy security sa nasud ug mamenosan ang pagsalig sa pribadong storage facilities ug imported nga suplay panahon sa krisis.
Dugang ni Garin nga nakakat-on ang gobiyerno og daghang leksiyon gikan sa bag-ohay nga pagsamot sa tensiyon sa Middle East ug mahinungdanon nga makapatukod ang Pilipinas og kaugalingong fuel stockpile aron adunay dugang reserba’ng suplay sa panahon sa emerhensiya. (BANAT NEWS)