CEBU, Philippines — Labing unang pinakadakong hangyo nga gihimo ni Presidente Ferdinand Marcos Jr. atol sa iyang ikalimang State of the Nation Address kagahapon, mao ang panawagan niya sa kongreso pagpasar og balaod para sa pagpalapad sa tax relief para sa mga middle class nga mga mamumuo.
Gusto ni Marcos nga dili na pabayron og buhis o income tax ang mga trabahador nga mokita og P350,000 kada tuig ug pagamyan sab ang buhis adtong mas dako pa ana og kita. Gawas pa niana, gusto sab niya nga i- exempt ang mga gagmay’ng mga negosyante sa pagbayad anang minimum corporate income tax ug pahatagan sab og tax amnesty katong mga wala pa nakabayad sa ilang income, estate, donor’s and value-added taxes ug mga penalties.
Sayo ning tuiga, si Senate President Sherwin Gatchalian niduso og balaudnon nga gitawag og GINHAWA bill, nga nagtinguhang amendahan ang kasamtangang National Internal Revenue Code pinaagi sa pagpataas sa income tax exemption threshold gikan sa kasamtangang P250,000 ngadto sa P400,000 kada tuig.
Gihisgutan sab ni Marcos ang kabahin sa gipaspasang pag-ugmad sa natural gas, hydrogen ug uban pang renewable energy sources isip kabahin sa tinguha sa nasud nga makabaton og lain-laing tinubdan sa enerhiya nga dili kinahanglang magsalig sa petrolyo gikan sa ubang nasud ug nagkataas nga singil sa kuryente dinhi.
Matud pa sa presidente, gipadayun na karon ang operasyon sa Malampaya gas field nga makasuplay pang enerhiya kutob sa tuig 2034.
Giugmad na sab ang ubang mga lugar nga naay mga deposito s natural gas ug hydrogen gikan sa Luzon, Visayas ug Mindanao.
Gawas pa ana, gusto sab ni Marcos patun-an og balik ang nuclear energy production apan kinahanglang luwas kining buhaton.
Matud pang Marcos hagbay rang nigamit og nuclear technology ang Pilipinas sa natad sa medisina, agrikultura, water filtration ug plastic upcycling.
Dako iyang pagtuong, masulbad sa nuclear energy ang seguridad sa enerhiya sa nasud.
Apil sa iyang gitinguha ang pagpahunong sa pagpabayad sa mga konsumidor anang “systems loss” sa bill sa kuryente pinaagi sa pagpaamendar sa EPIRA law.