CEBU, Philippines — Nanginahanglan karon ang Department of Social Welfare Services (DSWS) og pito ka Registered Psychometricians.
Kini ang hinungdan nga nihangyo si Konsehal Michelle Cellona sa buhatan ni Cebu City Mayor Nestor Archival, pinaagi sa Human Resource Development Office (HRDO), City Budget Office ug City Treasurer nga paspasan ang proseso sa pagkuha sa maong mga mental health professionals.
Si Cellona nagkanayon nga nagkadako ang panginahanglan sa mental health ug psychosocial support services sa siyudad alang sa kabataan, kababayen-an, solo parents, mga naapektuhan sa kalamidad, ug uban pang mga sektor nga nanginahanglan og social protection interventions.
Gihimug-atan sab sa DSWS nga adunay mahinungdanong papel sa paghatag og frontline social services, lakip na ang psychosocial intervention, crisis response, ug community-based support programs.
Human nga giaprubahan sa konseho ang resolusyon nga giduso ni Cellona, ang pito ka Registered Psychometricians motabang sa paghimo og mental health assessments, psychosocial interventions, referrals, ug pagpalig-on sa community-based mental health support programs alang sa mga labing nanginahanglan.
Gibasehan sab sa resolusyon ang Section 16 ug Section 17 sa Republic Act No. 7160 o ang Local Government Code of 1991 nga nagmando sa lokal nga kagamhanan sa pagpalambo sa kaayohan sa mga lumulupyo ug sa paghatag og batakang social welfare services.
Bisan og naaprubahan na ang resolusyon, ang pagkuha sa mga psychometricians magdepende gihapon kung mouyon si Mayor Archival ug magdepende sab kini sa panudlanan sa kagamhanan ug kinahanglan sab nga sundon ang Civil Service laws, qualification standards, budgeting ug auditing rules, ug uban pang may kalabutan nga mga balaod ug regulasyon. — /MEL (BANAT NEWS)