CEBU, Philippines — Gatusan ka Mandauehanon ang nakasulod og trabaho sa mga establisamento nga ilang giaplayan sa gipahigayon nga lokal ug overseas job fair nga gipasiugdahan sa lokal nga kagamhanan sa Dakbayan sa Mandaue pinaagi sa Public Employment and Services Office (PESO).
Naglakip kanila ang 49 ka nangaplay og trabaho nga na-hire dayon diha-diha human sa gihimong interview.
Gihimo ang maong job fair nunot sa tinguha ni Mayor Jonas Cortes nga pagtabang sa mga Mandauehanon nga nangita og trabaho.
Nasayran nga 38 ka lokal nga establisamento ug duha ka international companies ang niapil sa job fair ug nihatag og oportunidad sa trabaho.
Si Cortes nagdasig sa Mandaue City PESO sa paghimo pa og mga kalihokan aron kahatagan og trabaho ang mga nanginahanglan.
Si City Councilor Maline Cortes -Zafra, Executive Secretary Ernie Manatad, Marites Mercado, DOLE Tri-City Head, OIC Regional Director Karl Arriola, DMW, Arlyne Hamouy, DOLE ang nisuporta sa maong kalihokan. (BANAT NEWS)