CEBU, Philippines — Dili moapil sa transport strike karong adlawa ang PISTON -Cebu kini maoy gibutyag sa ilang Chapter President na si Greg Perez.
Matud ni Perez nga wala sila nideklarar og transport strike sa Cebu sanglit karong hapon, Abril 30, modiretso na sila og rally sa gawas sa buhatan sa Land Transportation Franchising and Regulatory Board (LTFRB)-7.
"Diretso nami (LTFRB)-7," sigon ni Perez.
Una niini, ang mga jeepney drivers nihimo og tulo ka adlaw nga nationwide strike agi og pagpadayag sa ilang pagsupak sa konsolidasyon sa mga drayber ug operators o paghugpong isip kooperatiba nga kabahin sa Public Utility Vehicle Modernization Program.
Karong adlawa, Abril 30 ang deadline sa konsolidasyon. Kadtong dili mosanong, may posibilidad nga dili na tugotan pang makapamasahero ang ilang mga karaang pasaheroan.
Ang PISTON didto sa kaulohan maoy nangulo sa nationwide strike nga nagsugod kagahapon Abril 29 ug matapos sa Mayo 1, Labor Day. Ang Police Regional Office (PRO)-7 sa pikas bahin motanyag og libreng sakay alang sa nga sumasakay nga dili makasakay.
Si PRO-7 Regional Director Brigadier General Anthony Aberin mipagawas og direktiba sa mga ginsakpan niini nga gamiton ang resources alang sa libreng sakay aron makatabang sa mga sumasakay nga maapektuhan sa strike.
"The overall security, safety, and transport convenience of our citizens is our priority. Rest assured that your PNP is always ready to extend a helping hand," sigon ni Aberin. (BANAT NEWS)