LTO nibukas og bag-ong licensing office sa Talamban

CEBU, Philippines — Si Assistance Secretary Vigor Mendoza II sa Land Transportation Office ania sa Dakbayan sa Sugbo aron sa pagtambong sa mga kalihokan lakip niini ang pagbukas sa Regional Office Licensing Section nga nahimutang sa Piazza Elesia, Gov. M. Cuenco Avenue, Barangay Talamban niining Dakbayan sa Sugbo.

Ang bag-ong licensing extension office diha sa Talamban anaa na usab diha ang Malasakit Center ug wala na diha sa buhatan sa Dalan N. Bacalso Avenue niining siyudad.

Si Mendoza mapasalamaton sa mga stakeholder nga libreng nipagamit sa maong dapit sa LTO-7 diin gihulagway kini nga mas hayahay nga lugar nga maka-accommodate sa mga taga Northern Cebu.

Samtang si Christopher Ferraren, acting chief sa Malasakit Licensing Center nibutyag nga ang maong Malasakit Center nga ilang gibuksan mas makapasayon kini sa mga residente sa 14 ka baranggay sa siyudad lakip na niini ang anaa sa kabukiran.

Samtang gipahibalo usab ni) Mendoza nga 11 ka adlaw human sa pagpalit sa usa ka sakyanan makuha na ang official receipt ug certificate of registration lakip na usab ang plaka diin ang maong sestema gisugdan kini niadtong kataposan nga bahin sa buwan sa Marso karong tuiga. Gipahibalo usab ni Mendoza nga gipatuman usab sa LTO ang 15 ka adlaw nga paghatag og pagtugot sa mga bag-ong nakapalit og motorsiklo ug sakyanan nga makabiyahe samtang nagpaabot pa sa OR, CR ug plate number.

Nunot niini, si Joel Maloloy-on, chief transportation officer sa LTO-7 nagkanayon nga sa 600 mil ka plate numbers nga wala mahatag sa mga tag-iya niini diin napundo kini sa storage sa LTO-7 sa Dakbayan sa Talisay niadtong Agosto sa nilabay’ng tuig ang anaa nalang sa 300 mil nga gidaghanon ang backlogs human nahatag na ang kapin sa 183 mil ug ilang gipaningkamutan nga mapatuman ang 11-day policy sa pag-release sa plaka.

Mahimo usab matangtang ang accreditation sa usa ka vehicle dealer kon dili usab kini katuman sa 11-day policy. BDB BANAT NEWS