CEBU, Philippines — Usa ka 24-anyos nga lalake ang gidakop human matud pa gibutang niini sa peligro ang kinabuhi ug kabtangan sa mga silingan diha sa Purok 3 Upper, Barangay Kamputhaw, Dakbayan sa Sugbo alas 7 sa buntag kagahapon human niini gisunog ang iyang mga gamit tungod sa kahubog.
Ang dinakpan mao si Phillip Rodriguez Belda, 24, residente sa naasoy nga lugar. Sa impormasyon sa Abellana Police Station 2 sa Cebu City Police Office (CCPO) pasado alas-2 sa kaadlawon kagahapon nakamata ang mga residente gikan sa pagkatulog tungod sa sunog.
Wala hinuon kadako ang sunog kay natabang ra dayon kini sa mga tawo sa lugar apan nakit-an nila nga ang suspek nigawas sa balay kung asa niya gisunog ang iyahang mga gamit hinungdan nga ilaha kining gidakop.
Ang suspek sa dihang nahinabi sa mga tigbalita miingon nga duna siyay dakong problema maong iya kining nabuhat. (BANAT NEWS)