1, 737 ka sakop sa PNP ug force multipliers ipakatap atol sa Ironman

CEBU, Philippines — Mokabat sa 1,737 ka PNP personnel uban sa mga force multipliers ang ipakatap aron mobantay sa ipahigayon nga 70.3 Ironman 2024 nga manukad sa Barangay Punta Ingaño paingon sa Lungsod sa Cordova hangtud na siyudad sa Sugbo.

Kini ang gipahibalo ni Police Colonel Ali Baron, Officer-In-Charge sa Lapu-Lapu City Police Office (LCPO) atol sa press briefing.

Matud pa ni Baron nga himoon karong adlawa, Huwebes Abril 18, 2024 ang dungan nga send-off sa mga PNP personnel uban sa task group gikan sa Cebu City Police Office (CCPO) ug PRO- 7 nga tahasan sa pagbantay sa maong kalihokan.

Gipasabot ni Baron nga sa ilang habig sa siyudad sa Lapu-Lapu ilang gilakip sa pagbantay ang mga dapit nga puy-an sa mga atleta ug mga bisita nga naglakip sa mga hotel ug ingon man ang mga tourist destination nga sagad suroyon sa paghatag kanila og kasiguroan.

Apil sa force multipliers nga moabag sa pagbantay sa kalihokan mao ang mga barangay tanod, mga volunteers group ug kauban usab niini ang Philippine Air Force (PAF) Philippine Army uban sa kasundalohan sa Naval Forces Central Command.

Samtang ang Mandaue City Police Office (MCPO) nag-organize usab og task group aron pagsiguro sa kaluwasan sa mga tawo nga mosaksi sa kalihukan sa paugnat sa kusog.

Dugang pa ni Baron nga ang ilang mga personnel habig sa siyudad sa Lapu-Lapu magpadayon sa ilang hugot nga pagbantay hangtud na sa Abril 27, 2024 nga mao usab ang pagpahigayon sa Kadaugan sa Mactan.

Si Presidente Ferdinand Bongbong Marcos uban sa mga opisyal sa nasudnong kagamhanan ang gipaabot nga mosaksi sa kalihukan. (BANAT NEWS)