Babaye ug langyaw napalgang patay

CEBU, Philippines — Napalgan nga wala nay kinabuhi ang usa ka French national nga lalake ug ang babayeng Pilipina sulod sa tent nga gipahiluna sa tugkaran sa usa ka subdivision sa Bool District, Tagbilaran City Probinsiya sa Bohol kagahapon sa alas- 7 sa buntag, Abril 12.

Ang lalakeng French Nationla nagpangidaron og 39 anyos, dunay kaipon ug lumad nga taga 118 Rue Letanduere 49100 Angers, France apan kasamtangan nga nagpuyo sa usa ka subdivision saTagbilaran City, Bohol.

Samtang ang babayeng patay na sab nag-edad og 30 anyos, duna say kaipon ug lumad nga taga Lungsod sa San Fernando sa Subu ug kasamtangan sab nga nagpuyo sa dapit diin magpuyo ang langyaw.

Sa impormasyon sa kapulisan sa Tagbilaran City Police Station nga nakadawat sila og tawag gikan sa concerned citizen ug nagpahibawo nga dunay duha ka patay nga lawas nga nadiskubrehan sa bakante luna sa subdivision.

Base sa ilang inisyal nga imbestigasyon ug pagsusi sa sud sa tent, nagtupad og higda ang duha diha sa sud ug parehong wala nay kinabuhi.

Dunay nakitang container sa muriatic acid ug balde sa chemical nga gituohang Hydrogen Sulfide diha sa sud sa maong tent.

Si Police Lieutenant Colonel Gerard Ace Pelare, tigpamaba ni Police Regional Office-7 Director Brigadier General Anthony Aberin miingon usa gitan-aw sa imbestigasyon ang posibilisad nga basin og nahilo ang duha gumikan sa mga chemicals nga nakita duol sa patay’ng lawas.

“We are still conducting investigation as to what really happened and we will update you the moment we will have the full report to be submitted by Tagbilaran City Police,” sigon ni Pelare. IBM BANAT NEWS