CEBU, Philippines — Mga customer sa fast food chain nabulabog human ang usa ka mini SUV nga sakyanan nibangga sa atubangang bahin sa nahisgutang kan-anan kagahapon sa buntag diha sa Barangay Poblacion West, Lungsod sa Moalboal.
Ang maong sakyanan gimaneho kini ni Anatolio Cardente, Jr., 64-anyos, residente sa San Roque Village, Barangay Calamba, Siyudad sa Sugbo kinsa niadtong higayona adunay gibisita diha Moalboal.
Matud ni Police Captain Claudio Gako, hepe sa Moalboal Police Station nga ibalhin unta ni Cardente ang sakyanan ngadto sa laing parking spot tungod kay anaay nakababag nga bus nga niadtong higayona nagpakanaog og pasahero.
Apan samtang nagpaatras sa iyang sakyanan naigo ni Cardente ang likod nga bahin sa bus.
Si Cardente nisuway og abante sa iyang sakyanan apan giingong nawad-an kini og control ug natumban og kusog ang gasolinador hinungdan nga nilahos kini sa fast food chain.
Ug gumikan sa maong hitabo naangol si Ni o Gabunada Besa, 33-anyos, residente sa Barangay Poblacion sa maong lungsod kinsa niadtong higayona nagkaon diha sa fast food chain ug dali kining gidala ngadto sa Badian District Hospital.
Si Cardente ang gikustodiya kini sa kapolisan sa lungsod ug gisuta pa ang danyos sa maong insidente. (BANAT NEWS)