Kalimpyo sa sapa angayan imintinar sa barangay

CEBU, Philippines — Nanawagan ang kadagkuan sa Taskforce gubat sa baha sa mga barangay officials nga motabang pag edukar sa katawhan aron magpabilin nga limpyo ang Kinalumsan River.

Ang pangulo sa Department of General Services ug River commander sa Kinalumsan River John Paul Gelasque, nibutyag nga ang mga residente nga nagpuyo duol sa nahisgutang sapa nagpadayon sa paglabay sa ilang basura diha sa sapa.

Kini bisan pa sa paningkamot sa kagamhanan sa siyudad nga magpabilin kini nga limpyo.

Sumala pa ni Gelasque nga ang mga barangay officials kinahanglan mohimo ug initiative sa pagpahinumdum sa ilang mga konstituente nga dili molabay sa ilang basura sa sapa tungod kay mao kini ang hinungdan sa pagbaha.

Gibutyag ni Gelasque ang mosulbad unta sa maong problema mao ang barangay level.

Ang Kinalumsan River nagsubay sa Barangay Buhisan, Labangon, Mambaling ug Duljo Fatima.

Kahinumduman gihimo na ang pagpanglimpyo sa nahisgutang sapa diin kapin sa usa ka gatus ka tonelada nga basura ang nakuha.

Ang barangay Labangon pinaagi sa pagpangu ni Barangay Captain Derrick Yap nihimo na og mga lakang aron paglimpyo sa sapa sama na lang sa pagbutang og river borders sa ilang barangay ngadto na sa silingang barangays.

Samtang giangkon ni Gelasque nga sila sa Taskforce dili makahimo nga sila lang ang mosagubang sa paglimpyo sa maong dapit, kinahanglan usab kini sa abag sa barangay ilabi na sa pag edukar kabahin sa proper solid waste management. (BANAT NEWS)