5 rebelde, usa ka polis patay

CEBU, Philippines — Unom ka tawo ang nakalas ug usa ang naangol sa nahitabong engkwentro tali sa mga gidudahang New People’s Army ug kapolisan diha sa Purok Matin-ao Dos, sa barangay Campago lungsod sa Bilar sa Probinsiya sa Bohol kagahapon sa buntag.

Ang lima sa nakalas gikatahong mga miyembro sa matud pa Bohol Party Committee sa NPA ug ang usa ka pulis nga kauban sa warrant servers nga modakop unta sa usa sa mga nakalas.

Si Police Lieutenant Colonel Norman Nuez, tigpamaba sa Bohol Police Provincial Office (BPPO) miingon nga usa ka Joint Enhanced Military Operation (JEMPO) ang gihimo sa kapulisan sa Bohol ug sa kasundalohan sa Visayas adtong tungora.

Ilaha untang sikupon pinasikad sa warrant of arrests si Domingo J. Compoc alyas Silong, Squad Leader  sa salin sa BPC ug kanhi Commanding Officer sa Sandatahang Yunit Pangpropaganda (SYP) Platoon sa BPC ug Most Wanted Person sa Bohol; Parlito Segovia alyas Aldrin, Assistant Squad Leader ug Political Guide; Marlon Omosura alyas Darwin, Squad Member;  Hannah Joy Cesista alyas Maya/ Lean;  ug usa ka alyas Juaning.

Apan giingong nisukol ang grupo ug nakigpinusilay sa mga polis.  Pagkahuman og tulo ka oras gikan alas 6:50 sa buntag hangtud alas 9:35 napalgan ang mga patay’ng lawas sa mga armadong grupo.

Gisusi pa sa kapolisan ang report kun si Cesista mao ang bag-ohay pang nakapasar sa 2023 Bar Examinations nga taga Cebu.

Sa usa ka post ni Jun Revocla o Jun Alcover, giingong abogada ang babayeng nakalas sa maong engkwentro. Apan wala pay kompirmasyon gikan sa kapolisan.

Apan nakalas sab sa maong hitabo si Police Corporal Gilbert Amper samtang laing usa ka Police Corporal sab ang naangol.

Si alyas Silong giingong dunay patong sa ulo nga P2. 6 milyones ug wanted kini tungod sa kasong rebellion, homicide, attempted homicide, multiple murder, frustrated murder, ug robbery.

Ang namatay nga pulis naigo sa ulo samtang ang usa naigo sa lawas, gidala sila sa Congressman Toribio Memorial Hospital.

Narekober sa kapulisan sa encounter site ang usa ka M16 Baby Armalite; usa ka R4 M16; laing usa ka M16; ug  tulo ka caliber .45 pistols.

Matud ni Nuez nga padayon ang hot pursuit operation batok sa ubang miyembro sa Bohol Party Committee.

Gikasubo sa  Police Regional Office(PRO) -7 pinangulohan ni Brigadier General Anthony Aberin ang kamatayon sa usa sa ilang tawo samtang naghimo sa iyang trabaho pagmentinar sa kahapsay ug kalinaw sa Probinsya.

“This is an operational breakthrough in our fight against the communists-terrorists in Bohol, neutralizing the remaining leaders of their decades of terrorism and extortion victimizing innocent civilians.  We call on the Boholanos to unite to help the government to finally defeat these heartless criminals who seek to destroy our peace and liberty,” sigon ni Aberin.  Giatiman na sa PRO-7 ang panginahanglanon sa civilian community nga naapektuhan sa engkwentro.

Duna na say team nga giumol aron masiguro nga ang nabiyaang pamilya sa namatay nga polis mahatagan sa tanang gikinahanglan nga tabang.

“The death of our hero cop will not be in vain and we shall continue doing our job well to give his sacrifices an everlasting meaning in the memory of his family and the Filipino people”, ni Aberin pa.

“The overall planning was conceptualized under Bohol PPOs Oplan T-Strike Fury under the Code Name “Game Over of COPLAN Aquila” which was intended to finally arrest and neutralize the remaining very elusive remnants of BPC under Domingo Jaspe Compoc known in the underground as “Silong”,” matud pa sa pamahayag nga gipagawas  PRO-7. --  IBM BANAT NEWS