Gipatay sa manghod

CEBU, Philippines — Patay ang usa ka lalaki human siya gipusil sa iyang manghod Biyernes sayo sa buntag Disyembre 1,2023 sa Sitio Kalubihan sa Barangay Labogon sa Siyudad sa Mandaue.

Giila ang biktima nga si Jaysomar Impas, 30, samtang ang nagpusil kaniya mao ang iyang manghod nga si Alvin.

Ang amahan nga si Agustin nga nahinabi sa mga tigbalita miasoy nga nasuko ang biktima kay gi-padlakan sa lain niyang anak ang pultahan sa balay.

Nasuko kini kay giduka na kaayo apan kay gikandadohan ang balay wala siya nakasulod.

Tungod sa kalagot nanghasi kini sa balay ug gikatahong gikulata ang kapuyo sa suspek. Ang suspek nga bag-o pang naabot gikan sa trabaho pagkasayod sa nahitabo sa iyang kapuyo wala makapugong sa kaugalingon ug mikuha kini og armas dayon gipusil iyang maguwang makadaghang higayon.

Ang biktima nakaangkon og daghan samad nga maoy hinungdan sa hinanali niining kamatayon.

Ang amahan sa duha mitug-an nga magsulod ug gawas na sa prisohan ang namatay tungod sa kaso sa ilegal nga drugas ug pagpangawat.

Ang kapolisan sa Presinto3 sa Mandaue City Police Office (MCPO) pinangulohan ni Police Major Jade Sumugat miresponde dayon sa lugar ug gisikop ang suspek.

gikordon ang lawak sa panimalay diin usab mahagba ang biktima nga naligo sa iyang kaugalingong dugo  samtang gipaabot pa ang SOCO nga mohimo  pa og paakisusi sa  patay'ng lawas

Ang suspek mitahan sa iyang kaugalingon human sa krimen. (BANAT NEWS)