CEBU, Philippines — Usa ka resolusyon ang giduso diha sa Konseho sa Dakbayan sa Sugbu nga nagmando sa Cebu City Transportation Office (CCTO) sa paghatag og report ug rekomendasyon bahin sa giingong 'cannibalization' sa mga motorsiklo ubos sa safekeeping sa maong buhatan.
Sumala sa bag-ong gitudlo nga Traffic Czar, Konsehal Rey Gealon samtang dunay gihimong imbestigasyon bahin niini, gipangilisan ang tanang mga gwardiya sa impounding area og mga sakop sa CTTO.
"We are awaiting the result of that investigation conducted by ccto. A city council resolution seeking for a report and recommendation on the matter is in order to pave the way for remedial legislation," matud sa Konsehal sa dihang nahinabi sa The Freeman kagahapon.
Gikataho niadtong miaging semana nga ang CCTO nilusad og imbestigasyon bahin sa report nga gipanghimulbolan ang mga motorsiklong gidala sa impounding area for safekeeping.
Si Atty. Kent Francesco Jongoy, Legal Officer sa CCTO nagkanayon nga dunay reklamante nga niduol sa ilang buhatan ug mireklamo nga ang iyang motorsiklo nga gi kustodiya sa CCTO nangawad-an og pipila ka piyesa sa dihang iyaha na unta kining lukaton.
Sa pagkakaon, wala pa mahibaw-i sa CCTO kun ang mga security personnel nga na-deploy sa safekeeping area dunay kalambigitan sa insidente samtang nagpaabot sa resulta sa imbestigasyon.
"The question as to whether or not a third party security agency, whose personnel are solely and directly assigned in the custody of government-impounded vehicles within government property, is the rightful, legal and proper arrangement under the circumstances vis-a-vis the accountability and responsibility of the enforcing office, moving forward," matod ni Gealon kagahapon (Domingo). — /IBM (BANAT NEWS)