CEBU, Philippines — Wala na’y nisita nga taga Cebu Port Authority (CPA) sa ikaduhang hugna sa clean-up drive sa mga satellite workers sa City Hall diha sa baywalk area sa South Road Properties.
Suma pa sa assistant on special projects ni Mayor Michael Rama nga si Ramil Ayuman nga tulin o hapsay ra ang ilang clean-up dili sama sa unang hugna nga duna gyuy taga CPA nga nisita nga nakapasuko og maayo sa mayor.
Dugang ni Ayuman nga matag semana nila himoon ang pagpanglimpyo hangtud nga monindot og samot ang baywalk.
Dul-an sa pito ka tonelada ang nahipos nga basura kun diin ang 70% niini mga plastik samtang ang 30 porsyento ang mga rubber, foams, textiles ug uban pa.
Aduna usay gihimong pagpanglimpyo sa SRP tower ug sa mga lugar nga gipuy-an sa mga Badjao nga gipanguluhan mismo ni Mayor Michael Rama uban sa mga sakop sa Department of Environment and Natural Resources DENR nga natumong usab sa international Earth Day.
Daghan ang misalmot sa gihimong earth day clean up uban sa pakig alayon sa World Mission Society Church of God, Filinvest ug Cebu City River Warriors.
Nanghinaot si Ayuman nga sa sunod nga clean up drive mosalmot na ang taga CPA base usab sa ilang gipagawas nga statement nga motabang kini pagpatuman sa kalimpyo sa maong area. (BANAT NEWS)