Presyo sa karneng baboy sa Tabunok misaka
MANILA, Philippines — Nimahal na ang presyo sa karneng baboy nga gibaligya diha sa merkado sa Tabunok, Dakbayan sa Talisay tungod sa kanihit na sa suplay sa baboy nga pang-ihawon kada adlaw.
Kini maoy gibutyag sa mga manindahay nga nagsagubang sa kamingaw sa ilang paninda. Si Richelle Famulagan, manindahay sa merkado niingon nga grabe gyud ang epekto sa African Swine Fever (ASF) tungod kay hasta ang mga kunsumidor niini nilikay una sa pagpalit.
Bisan paman og nipadayag na ang Department of Health (DOH) nga walay epekto ang ASF sa panglawas sa tawo.
Si Annie Magbanua, mamaligya sab og karneng baboy nitataw nga wala sab silay mahimo kundi sa pagpasaka og presyo tungod sa kanihit sa suplay sa baboy. Kaniadto mopresyo lang sa P270 ngadto sa P280 ang kilo sa karneng baboy apan karon nisaka kini sa P300 ngadto sa P310 matag kilo.
Mimahal gihapon kini bisan gilibkas na ang border control checkpoints sa pagbiyahe sa mananap.
Apan bisan pa niini estrikto gihapon ang Talisay sa paginspeksyon sa mga baboy nga ipasulod sa siyudad aron nga masigurong luwas ang mga karneng baboy nga gipamaligya sa merkado. (BANAT NEWS)
- Latest
