Malungay, Never Give Up, Azitron daog dayon sa LBA Christmas League 2022
CEBU, Philippines — Angayan gyud nga bansagan sa ngan nga “coach” si Gene Pellejera gumikan kay iyang giagak ang team Malungay ngadto sa kadaogan batok sa Cyrax, 65-53 sa LBA Christmas League 2022 niadtong Miyerkules diha sa Lamac gym, Consolacion.
Si Pellejera miiskor og 18 puntos ug nangulo sa tanang scorer sa Malungay nga nidominar sa tibuok duwa, gisundan ni Joseph Saranza nga dunay 10 puntos. Ang Cyrax nga nakasikit unta sa halftime, 24-25 gipangulohan ni Cyril Agad sa iyang 15 puntos.
Sa laing aksiyon, ang Never Give Up midaog sa ligas nga duwa batok sa C’Mart, 50-48.
Nilabaw unta ang C’Mart, 38-29 human sa third period, apan nagmangtas silang Vanz Abatayo ug Julieto Lacio sa fourth quarter aron mapapas ang labaw. Si Abatayo mikulit og 13 puntos, samtang si Lacio mikadlit og 10 puntos. Si Raque Malicay maoy topscorer sa napildeng C’Mart pinaagi sa iyang 12 puntos.
Midaog sab ang Azitron pinaagi sa paglubong sa CebuTech, 71-47 ubos sa pagpangulo nilang Jomer Labad ug Mario Tibon nga nagkumbinar og 23 puntos, samtang ang pilderong CebuTech gipangulohan sab nilang Juksan Cairo ug Cristobal J. nga parehong mirehistro’g 10 puntos.
Ang Malungay, Never Give Up ug Azitron adunay managsamang 1-0 records ning maong liga nga nahimo pinaagi sa paningkamot ni LBA president Roy Ermac sa abag nilang Roger Lagozar, Greg Janginon ug Rolando Geverola.
- Latest