CEBU, Philippines — Uyon ra si Talisay City Mayor Gerald Anthony “Samsam” Gullas nga ipahigayon ang trade fair sud sa tibuok buwan sa Disyembre diha sa siyudad.
Kini maoy iyang gipadayag sa grupo sa mga negosyante pinangulohan ni Cyril Velasco.
Apan mag-agad gihapon ang mayor sa desisyon sa mga negosyante.
Matud pa ni Gullas nga lain-laing mga negosyante ang gusto motinda sa ilang produkto sa ipahigayon unya nga trade fair diha sa Talisay City Hall grounds.
Nagkanayon ang mayor nga natayming ang trade fair sa ilang pagpasiga na sa mga dayan-dayan sa pasko karong Disyembre 1 diha sa City Hall ug sa Poblacion.
Pinaagi niini mahimong maagni ang mga kustomer sa pagbisita sa lugar tungod sa kanindot unya sa ilang plaza nga maoy makabintaha sa mga nisalmot sa kalihukan.
Ang trade fair pagahimoon sa Disyembre 15 ngadto sa 18 ning tuiga. Mao kini ang ikaduhang trade fair nga ipahigayon human sa unang trade fair nga nagmalampuson niadtong milabay nga mga buwan.