Konseho sa Cebu City niaproba na sa insintibo sa Lumad Basakanon
CEBU, Philippines — Giaprobahan na sa konseho sa Dakbayan sa Sugbo ang paghatag og P500,000 nga financial incentive sa Tribu Lumad Basakanon diin gi-charge kini sa City-Sponsored Activities-Other account.
Ang maong financial incentive adunay kalabotan sa pag-angkon niini og bulawang medalya atol sa Powerful Daegu Festival 2022 nga gipahigayon didto sa Daegu, South Korea niadtong buwan sa Hulyo niining tuiga .
Si Konsehal Donaldo “Dondon” Hontiveros ang nangamahan sa resolusyon kalabot niini.
“The Cebu City government gives recognitions and supports to Cebuano talents, athletes, and personalities who are giving pride and honor to the city”, matud ni Hontiveros.
Sayo pa, si Mayor Michael Rama nisaad nga mohatag og insentibo nga P500,000 sa Tribu Lumad Basakanon gumikan sa paghatag nila og garbo sa tibuok nasud.
Nasayran nga ang siyudad nisuporta sa Lumad Basakanon contingent pinaagi sa paghatag sa grupo og pinansial nga hinabang nga magamit alang sa ilang mga galastohan sa ilang pagbiyahe paingon ngadto sa South Korea apan wala gibutyag ang kantidad nga nahatag sa kagamhanan sa siyudad.
Nadaog sa grupo atol sa competition ang kinatibuk-ang kantidad nga P342,000.
Gimandoan ni Rama si Hontiveros, kinsa maoy chairman sa committee on tourism sa konseho sa siyudad sa pagtrabaho sa mga dokumento nga gikinahanglan alang sa paghatag sa financial incentive sa grupo.
Gipakita sa Tribu Lumad Basakanon ang hugyaw nga musika ug tema sa Sinulog atol sa competition diin sila ang napiling mananaog. BDB (BANATNEWS)
- Latest
